Xətai rayonunda abad həyət istifadəyə verildi

  • SpaceTV
  • 20 Sentyabr 2019 11:21

Heydər Əliyev Fondunun vitse-prezidenti, İDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilən, təmirsiz həyətlərin abadlaşdırılmasına yönəlmiş “Bizim həyət” layihəsi paytaxt Bakı şəhərində uğurla davam edir.

“Bizim həyət” layihəsi çərçivəsində  abadlaşdırılan  növbəti həyət ötən  gün paytaxt sakinlərin  istifadəsinə  verilib. Ümumi sahəsi 12000 kvadratmetr olan həyət Xətai rayonu, Lütfi Zadə 10, M.Rüstəmov 21, Sarayevo 19 ünvanlarında 2500 nəfər sakinin yaşadığı beş 9 mərtəbəli və iki 16 mərtəbəli binaları əhatə edir.

Lahiyə çərçivəsində abadlaşdırılan növbəti həyətdə əlil və sağlamlıq imkanları  məhdud  insanların da rahat  hərəkəti nəzərə alınıb, bütün yaş qrupları üzrə uşaqların inkişafı üçün əlverişli şəraitin yaradılması və gənclərin asudə vaxtlarının səmərəli keçirilmələri məqsədi ilə ərazidə mini futbol və basketbol  meydançaları, şahmat  meydançası, söhbətgahlar, müxtəlif yaş qrupları üçün  nəzərdə  tutulmuş  idman  qurğuları, uşaqlar üçün  oyun meydançası və oturacaqlar quraşdırılıb.

Eyni zamanda, ərazidə velosiped yolu, 10 söhbətgah inşa edilib, çoxsaylı oturacaqlar, tullantılar üçün qutular quraşdırılıb, həyətdəki xeyir-şər evi əsaslı təmir olunub və bütün avadanlıqlarla təmin edilib.

Sakinlərin istək və maraqları nəzərə alınaraq, həyətlərdə yeni işıqlandırma  dirəkləri quraşdırılıb, binaların fasadları və giriş hissələri də tam təmir olunaraq onların istifadəsinə verilib. Həyətin ərazisindəki mövcud yaşıllıqların  bərpası  ilə yanaşı, əlavə  olaraq 100  ədəd  ağac əkilib və 4min 500 kv.m  ərazidə yaşıllıq zolağı salınıb. Bina sakinlərin təhlükəsizliyinin təmin olunması məqsədilə ərazidə müşahidə kameraları quraşdırılıb.

Məlumat üçün  bildirək ki, bu gün sakinlərin istifadəsinə verilmiş abad  həyət  “İDEA  İctimai  Birliyinin” təşəbbüsü  ilə  abadlaşdırılmış 30-cu həyətdir.

Rəşad Vəkiloğlu Space

Paylaş

 Xəbəriniz olsun