Qədim tapıntı

  • SpaceTV
  • 31 Avqust 2019 14:10

Lənkəranda qazılan quyudan qədim maddi-mədəniyyət nümunələri tapılıb. Küp sınıqları, boşqab qalıqları və çıraqlar tarixi əhəmiyyət daşıyır.

Lənkəranın  Sütəmurdov  kənd sakini Xəyal Məmmədov  deyir ki,  15 il əvvəl də həyətlərində  quyu qazılarkən oxşar hadisə ilə qarşılaşıblar.  Amma  əhəmiyyət verilməyib.  Bu dəfə  quyuda aşkarlanan   müxtəlif ölçülü küp sınıqları, boşqab qalıqları, çıraqlar diqqəti daha çox cəlb edib.  Bu barədə məlumatlandırılan  AMEA-nın  Lənkəran Regional  Elmi  Mərkəzinin əməkdaşları  quyuya baxış keçirib. Təqribən eni 1,  dərinliyi 5 metr olan  quyunun profilində qalınlığı 3 metrdən yuxarı olan mədəni təbəqə  aşkarlanıb.  Məhz həmin təbəqədə aşkarlanan  tapıntıların   orta əsrlər dövrünə aid olduğu müəyyən edilib.

Mütəxəssisin bildirdiyinə görə  mədəni   təbəqənin profilində   0, 7 metr qalınlığında  yanğın izləri, saxsı qırıntıları, kömür qalıqları  və qalın kül qatı   sübut edir ki,  burada  həyat ardıcıl, intensiv davam edib. Sonralar  abidənin üzərində kənd yaşayış yeri salındığından mədəni  təbəqə qismən də olsa, dağıntılara məruz qalıb. 

Tapıntılar tədqiq olunması  üçün Lənkəran Regional  Elmi Mərkəzinin  arxeologiya şöbəsinə təqdim olunub. Tədqiqat işləri başa çatdırıldıqdan sonra  abidə  haqqında  elmi məqalə hazırlanaraq  elmi ictimaiyyətə çatdırılacaq.

Rövşən Almazoğlu Space Lənkəran

Paylaş

 Xəbəriniz olsun