Paytaxtda dəhşətli hadisə baş verib. İki bacı dəm qazından zəhərlənərək ölüb.

• SpaceTV
• 16 Aprel 2020 10:28

Paytaxtda şirkətlərin birində reklam agenti olaraq işləyirdilər və 3 il idi ki,  bu ünvanda rəfiqələri ilə birgə yaşayırdılar. Aytən və Aygün haradan biləydi ki, aprelin 14-ü onlar üçün həyatlarının son günüdür.

Səsssiz gələn əcəl onları mətbəxtdə haqlayıb. Paytaxtın Xətai rayonunda baş verən hadisədən danışan qonşular dəhşətli olayın gecə saatlarında yaşandığını  deyirlər. Onların sözlərinə görə bacılar Gəncə prospekti 34 ünvanındakı yaşayış binasında kirayə yaşıyırmışlar. Hadisə yerində olarkən onu da öyrənirik ki, qızlar Qax rayon sakinləridir.

Qızların yaşadığı iki otaqlı mənzilin eyvanı bu günə qədər mətbəx kimi istifadə olunub. Orada quraşdırılan və qazla işləyən su qızdırıcı dəfələrlə söndüyündən, həmin vaxtdan otaqdan qaz iyi gəlib. Amma nədənsə məsələyə o qədər ciddi yanaşılmayıb. Bu səbəbdən növbəti qazsızması iki gəncin ölümü ilə nəticələnib.

Qeyd edək ki, qızlardan başqa ailənin digər övladı yoxdur. Dəm qazından boğulub ölən qızların ailəsində ana və atadan başqa nənələri var ki, o da elə qızlar dünyasını dəyişən günün səhər saatlarında kənddə dünyasını dəyişibmiş. Yəni bir gündə bir ailədə 3 ölüm.. dəhşətlidir.  Dəm qazı adlanan  əcəl daha neçə gəncin ömrünü yarıda qoyacaq onu bilmirik. Bildiyimiz tək bir fakt var. O da bir ata-ananın sevə-sevə böyüdüb boya-başa çatdırdığı, evindən gəlinlik paltarında toy evinə yol salacağını gözlədiyi iki gənc qızının indi ağ kəfəndə çiyinlərdə son mənzilə yola salınmasıdır. Bu qapıda toy ola bilərdi. Hansı ki, indi yas çadırı qurulub və ən dəhşətlisi budur ki, bu qapıda heç vaxt vağzalı çalınmayacaq. Bu dəhşətlərin yaşanmaması üçün isə qazla çox ehtiyatlı olmaq tələb olunur.

NƏRGİZ ƏRƏSTUNQIZI SPACE TV