Azərbaycanda əhali ən çox nəyə pul xərcləyib? – FOTO

  • Space TV
  • 12 Fevral 2021 17:21

2021-ci ilin yanvar ayında pərakəndə ticarət şəbəkəsində istehlakçılara 3,2 milyard manatlıq məhsul satılıb.

Spacetv.az-ın Dövlət Statistika Komitəsindən əldə etdiyi məlumata əsasən, ötən ay əhaliyə 1,7 milyard manatlıq ərzaq məhsulları, içkilər və tütün məmulatları, 1,5 milyard manatlıq qeyri-ərzaq malları satılıb.

2020-ci ilin yanvar ayı ilə müqayisədə pərakəndə ticarət dövriyyəsi real ifadədə 1,4 faiz azalıb. Belə ki, pərakəndə ticarət dövriyyəsi qeyri-ərzaq malları üzrə 4,8 faiz azalıb, ərzaq məhsulları, içkilər və tütün məmulatları üzrə isə 1,8 faiz artıb.

Hesabat ayında əmtəə bazarı aşağıdakı göstəricilərlə xarakterizə olunub:

Ötən ay 1 milyard 468,3 milyon manat dəyərində ərzaq məhsulları, 196,7 milyon manat dəyərində içki və tütün məmulatları, 495,2 milyon manat toxuculuq məhsulları, geyim və ayaqqabılar, 159,6 milyon manat dəyərindən elektrik malları və mebellər, 21,9 milyon manat dəyərində kompütərlər, telekommunikasiya avadanlıqları və çap məhsulları, 68,7 milyon manat dəyərində əczaçılıq məhsulları və tibb ləvazimatları, 172,1 milyon manat dəyərində avtomobil benzini və dizel yanacağı, 572,3 milyon manatlıq digər qeyri-ərzaq malları istehlak edilib.

2020-ci ilin yanvar ayı ilə müqayisədə ərzaq məhsullarının istehlakı 1,9 faiz, içki və tütün məmulatlarının istehlakı 0,4 faiz, kompütər, telekommunikasiya avadanlıqları və çap məhsullarının istehlakı 2,6 faiz, əczaçılıq məhsulları və tibb ləvazimatlarının istehlakı 40,1 faiz və digər qeyri-ərzaq malları istehlakı 1,4 faiz artıb. 

Ölkədə toxuculuq məhsulları, geyim və ayaqqabıların istehlakı 10,1 faiz, elektrik malları və mebellərin istehlakı 14,3 faiz, avtomobil benzini və dizel yanacağının istehlakı 12,1 faiz azalıb.

2021-ci ilin yanvar ayında alıcıların son istehlak məqsədilə aldıqları mallara xərclədiyi vəsaitin 52,8 faizi ərzaq məhsulları, içkilər və tütün məmulatlarının, 15,7 faizi toxuculuq məhsulları, geyim və ayaqqabıların, 5,4 faizi avtomobil benzini və dizel yanacağının, 5,1 faizi elektrik malları və mebellərin, 2,2 faizi əczaçılıq məhsulları və tibbi ləvazimatların, 0,7 faizi kompüterlər, telekommunikasiya avadanlıqları və çap məhsullarının, 18,1 faizi isə digər qeyri-ərzaq mallarının alınmasına sərf olunub.

İstehlak məhsullarının dəyər ifadəsində 26,9 faizi ticarət müəssisələri, 49,8 faizi fərdi sahibkarlar tərəfindən, 23,3 faizi isə bazar və yarmarkalarda satılıb.

Ötən ilin yanvar ayı ilə müqayisədə pərakəndə ticarət dövriyyəsi real ifadədə müəssisələr üzrə 12,2 faiz artıb, fərdi sahibkarlar üzrə 0,1 faiz, bazar və yarmarkalarda 15,7 faiz azalıb.

2021-ci ilin yanvar ayında ticarət şəbəkəsində bir ölkə sakini orta hesabla 316,3 manatlıq, o cümlədən 166,9 manatlıq ərzaq məhsulları, içkilər və tütün məmulatları, 149,4 manatlıq qeyri-ərzaq malları alıb. 

Paylaş

 Xəbəriniz olsun