Abad həyət istifadəyə verildi

  • SpaceTV
  • 20 Sentyabr 2019 11:41

 “Bizim həyət” layihəsi çərçivəsində  abadlaşdırılan  növbəti həyət bu gün paytaxt sakinlərinin  istifadəsinə  verilib. Həyət Yasamal rayonu,Yeni Yasamal qəsəbəsi , 2 ci yaşayış massivində 1400 nəfər sakinin yaşadığı iki 10 bloklu binanı əhatə edir.

Layihə çərçivəsində abadlaşdırılan növbəti həyətdə əlil və sağlamlıq imkanları  məhdud  insanların da rahat  hərəkəti nəzərə alınıb, bütün yaş qrupları üzrə uşaqların inkişafı üçün əlverişli şəraitin yaradılması və gənclərin asudə vaxtlarının səmərəli keçirilmələri məqsədi ilə ərazidə mini futbol və basketbol  meydançaları, şahmat  meydançası, müxtəlif yaş qrupları üçün  nəzərdə  tutulmuş  idman  qurğuları, uşaqlar üçün  oyun meydançası və oturacaqlar quraşdırılıb.

Eyni zamanda, ərazidə 100 metr  uzunluğunda velosiped yolu, 4 ədəd söhbətgah inşa edilib, çoxsaylı oturacaqlar, tullantılar üçün qutular quraşdırılıb, həyətdəki xeyir-şər evi əsaslı təmir olunub və bütün avadanlıqlarla təmin edilib.

Sakinlərin istək və maraqları nəzərə alınaraq, həyətlərdə yeni işıqlandırma  dirəkləri quraşdırılıb, binaların fasadları və giriş hissələri də tam təmir olunaraq onların istifadəsinə verilib. Həyətin ərazisindəki mövcud yaşıllıqların  bərpası  ilə yanaşı, əlavə  olaraq 50  ədəd  ağac əkilib və 160 kv.m  ərazidə yaşıllıq zolağı salınıb. Bina sakinlərinin təhlükəsizliyinin təmin olunması məqsədilə ərazidə müşahidə kameraları quraşdırılıb.

Məlumat üçün  bildirək ki, bu gün sakinlərin istifadəsinə verilmiş abad  həyət  “İDEA  İctimai  Birliyinin” təşəbbüsü  ilə  abadlaşdırılmış 31-ci həyətdir.

Rəşad Vəkiloğlu Space

Paylaş

 Xəbəriniz olsun